Gjykata e Tiranës ka liruar një prej protestuesve të arrestuar dy ditë më parë në protestën e mbajtur nga opozita, ku u bllokuan prej rreth tre orësh 5 akse kryesore në kryeqytet.
Bëhet fjalë për 53-vjeçarin Ilir Hamedani, i cili u arrestua tek bllokimi i rreth rrotullimit të “Zogut të Zi” nën akuzat për veprat penale “Pengimi i qarkullimit të mjeteve të transportit”, “Prishja e rendit dhe e qetësisë publike”, “Mosbindja ndaj urdhrave të punonjësit të rendit publik” dhe “Dëmtime të tjera me dashje”.
“Ky shtetas, me veprime të dhunshme ka bllokuar lëvizjen e një automjeti tip “Benz”, duke bllokuar rrugën, dhe ka goditur drejtuesin e mjetit shtetasin A. G. Drejtuesi i mjetit u procedua në gjendje të lirë për veprën penale “Dëmtime të tjera me dashje” – thuhej në njoftimin e Policisë.
Ndaj tij, togat e zezë kanë caktuar ditën e sotme masën e sigurisë “Detyrim paraqitje”. Ndërkohë, protestuesi tjetër i arrestuar Sokol Ndoj do të dalë ditën e nesërme para gjykatës për rivlerësimin e masës së sigurisë.
Kujtojmë se nën hetim Policia vendosi edhe 17 deputetë të PD-së, duke përfshirë dhe Sekretarin e Përgjithshëm, Flamur Noka dhe kreun e grupit parlamentar Gazment Bardhi. Po ashtu nën hetim u vu dhe Sekretari Organizativ, Ervin Minarolli.
Ata akuzohen për veprat penale “Pengimi i qarkullimit të mjeteve të transportit”, “Organizimi dhe pjesmarrja në grumbullime e manifestime të paligjshme”, “Mosbindja ndaj urdhrave të punonjësit të rendit publik”, “Prishja e rendit dhe e qetësisë publike”, ndërsa Flamur Nokës i është shtuar dhe vepra penale “Goditjet për shkak të detyrës”.
