14-vjeçari Mario Përlleshi ka lënë ditën e sotme ambientet e spitalit privat ku qëndronte prej ditës së krimit dhe është transferuar në burgun e të miturve në Kavajë.
Ai akuzohet për vrasjen me thikë të bashkëmoshatarit të tij, Martin Cani dhe plagosjen e shokut të këtij të fundit, Luis Meçe, ngjarje kjo e ndodhur mesditën e 18 nëntorit pranë shkollës “Fan Noli” në Tiranë.
Si pasojë e sherrit mes të miturve, i plagosur në dorë me thikë mbeti dhe vetë Mario Përlleshi, i cili prej ditës së krimit dhe deri më sot ndodhej në ambientet e një spitali privat.
Ai nuk ka qenë bashkëpunues me grupin hetimor, duke mos treguar motivin e sherrit mes të miturve, si dhe nuk tregoi as se ku e kishte fshehur armën e krimit, e cila u gjet pas disa ditësh rastësisht nga një qytetar, i cili njoftoi më pas Policinë.
