Janë zbardhur detaje të reja nga operacioni i SPAK me disa urdhër-arreste të lëshuara dhe i përqëndruar në qytetin e Elbasanit.
Burime për mediat bëjnë me dije se me urdhër të SPAK janë ushtruar kontrolle në disa biznese të mëdha në Elbasan të lidhura me Suel Çelën si dhe në banesat e familjarëve të personave të implikuar në ngjarje të mëdha kriminale.
Kujtojmë se Suel Çela është shpallur në kërkim që në maj të vitit 2022 në kuadër të operacionit “Plumbi i Artë” të organizuar nga SPAK. Sipas dëshmisë së Nuredin Dumanit ai është porositës i tre ngjarjeve 2 të parealizuara dhe 1 e mbetur në tentativë.
Suel Çela akuzohet se ka porositur atentatin e dështuar të 29 marsit 2022 ndaj Elton Kilës, që do ta kryente bashkëpunëtori i drejtësisë, Nuredin Dumani, por i cili mbeti i plagosur rrugës dhe më pas u arrestua.
Çela nga Elbasani, rezulton i dënuar në Itali për trafikim narkotikësh, por ai ka arritur t’i shpëtojë burgut. Në nëntor 2019, Gjykata e Elbasanit vendosi ta shpallë të pafajshëm Çelën për sulmin ndaj policisë tek tregu ushqimor i Elbasanit.
Kujtojmë se gjatë operacionit të sotëm të SPAK është caktuar masë “arrest shtëpie” për ish-gjyqtaren Pajtime Fetahu, si dhe është arrestuar edhe ish-kreu i Gjykatës së Elbasanit, Zihni Shahu.
Kujtojmë se ndaj Pajtime Fetahut u caktua masa “Arrest shtëpie” dhe gjatë operacionit të SPAK, “Plumbi i Artë 2” për grupet kriminale, ku u lëshuan mbi 30 udhër arreste. Për atë dosje, Pajtime Fetahu dyshohet se mund të ketë lidhje me krimet e vëllezërve Franc dhe Hajdar Çopja, duke nxjerrë informacione të klasifikuara sekret.
Ndërsa ish-gjyqtari Zihni Shahu dha dorëheqjen rreth 7 muaj pas nisjes së procesit të vettingut, pasi ndaj tij kishte filluar hetimi administrativ dhe kërkoi të përjashtohej për 15 vjet nga e drejta për të punuar në sistemin e drejtësisë.
“Në datën 20.7.2020 subjekti i rivlerësimit, përmes postës elektronike, deklaroi për Komisionin se hiqte dorë nga detyra e magjistratit, moskandidimin në detyrë për një afat prej 15 vitesh, si dhe pas këtij njoftimi do t’i drejtohej organit kompetent, KLGJ-së, sipas ligjit për dorëheqjen”, thuhej në vendimin e publikuar nga Komisioni.
KPK vuri në dukje se pas këtij vendimi u vendos ndërprerja e procesit të vettingut ndaj tij dhe Komisionoi e sanksionoi që t’i ndalohej të ishte pjesë e sistemit për 15 vjet.
Gjatë operacionit të sotëm, SPAK ka lëshuar masën e sigurisë “arrest shtëpie” dhe për gazetarin Artan Hoxha, i cili akuzohet për veprën penale “anëtar i organizate kriminale”. Po ashtu edhe ndaj gazetarit Elton Qyno është caktuar masa e sigurisë “detyrim paraqitje”, teksa ky i fundit akuzohet për veprën penale “korrupsion pasiv”.
Burime bëjnë me dije se bëhet fjalë për një operacion të madh, ku përfshihen edhe persona të tjerë, teksa operacioni është ende në vijim dhe nuk dihen detaje konkrete.
