Enton Abilekaj ka reaguar pas lajmit se dy gazetarët Elton Qyno dhe Artan Hoxha, janë vendosur në masë sigurie “detyrim paraqitje” nga SPAK, në kuadër të hetimeve për një grup kriminal.
Abilekaj tha se gazetarët e kronikës janë të detyruar të kenë kontakte me krimin për të marrë informacion dhe se SPAK duhet të zbardhë menjëherë rolin e tyre, nëse kanë një të tillë dhe se SPAK duhet të tregojë kujdes në raste të tilla, kur bëhet fjalë për persona që rrezikojnë edhe jetën duke kryer detyrën.
“Ne do të shohim se çfarë do të na thotë SPAK për ‘kriminelët’ e rrezikshëm në rradhët tona pa asnjë komunikatë. Nuk e di çfarë ka këtu për sekretin hetimor. Por edhe akuza nuk më tingëllon fare, nuk dua të paragjykoj asgjë. Çdo gazetar kronike në Shqipëri është i detyruar të ketë kontakte me çdo grup kriminal për të cilët shkruan dhe flet në TV. Edhe nëse nuk i merr ai, e marrin ata. Ka gazetarë në botë që takojnë terroristë.
Kur ngre akuza për gazetarë, që rrezikojnë edhe jetën për të marrë informacione, kur merren në telefon prej tyre dhe shantazhohen por edhe informohen ndonjëherë, duhet patur kujdes, sepse kjo mund të penalizojë çdo qytetar dhe gazetar”, tha Abilekaj.
