Kreu i Prokurorisë së Posaçme, Altin Dumani, gjatë një interviste për emisionin “3D” deklaroi se ka futur si kulturë në institucionin që ai drejton se prokurorët dhe hetuesit e BKH-së i raportojnë për të gjithë personat që i kontaktojnë që janë të interesuar për një çështje.
Dumani tha gjatë një interviste për emisionin “3D” se jetojmë në një vend ku të gjithë jemi të intersuar të kontaktojmë apo të ndërhyjmë në një çështje dhe sipas tij, hetuesit dhe prokurorët kontaktohen nga persona që kanë interes për çështje të caktuara.
“Ne nuk e mohojmë që punojmë në një vend si Shqipëria, në një vend të vogël ku të gjithë e njohim njëri-tjetrin dhe po nuk e njohëm, do gjejmë një njeri të tretë që ta njohë atë që duam ta njohim apo të kemi kontakt dhe për më tepër vijmë nga një kulturë e tillë që shkojmë kontaktojmë, ndërhyjmë etj. Por, ajo që shoh me kënaqësi është që prokurorët e SPAK dhe oficerët e BKH-së janë përpjekur dhe ja kanë arritur të largohen nga kontaktet, nga miqtë edhe nga disa familjarë që mund të konsiderohen të papërshtatshëm për punën që ne bëjmë.
Tjetër që që jam përpjekur të fus në kolektivin e SPAK është kultura e raportimit. Ne në Shqipëri vuajmë nga mungesa e raportimit. Që do të thotë që nëse një hetues apo prokuror thjesht kontaktohet nga një person i interesuar në një çështje, ai duhet ta raportojë. Këtë e konstatoj me kënaqësi që hetuesit, por edhe prokurorët kanë filluar ta përqafojnë këtë kulturë të raportimit.” – tha Dumani.
