Kryedemokrati Sali Berisha ka reaguar pasi Gjykata Kushtetuese vendosi të pranojë pjesërisht kërkesën e tij në lidhje me masën e sigurisë së parë të lëshuar nga SPAK “detyrim paraqitje” dhe bllokim pasaporte, duke e konsideruar të paligjshme pa i hequr imunitetin Kuvendi.
Gjykata Kushtetuese e ka konsideruar proporcionale vetëm masën “detyrim paraqitje” dhe jo proporcionale masën për bllokim të pasaportës për t’i bllokuar daljen jashtë vendit.
Në lidhje me masën detyrim paraqitje, Kushtetuesja thekson se “gjykata njëzëri arriti në përfundimin se në rastin konkret, kjo masë nuk përbën kufizim të lirisë personale dhe, për pasojë nuk nevojitet autorizimi nga Kuvendi për zbatimin e saj ndaj deputetit”.
Përpara mbështetësve të tij të vendosur poshtë dritares së apartamentit ku qëndron në arrest shtëpie prej dhjetorit të vitit të kaluar, Berisha e cilësoi antikushtetues dhe të turpshëm këtë vendim të Gjykatës Kushtetuese.
Berisha thekson se ky është një kapitull tjetër i turpit, i paralajmëruar 10 ditë më parë nga Ulsi Manja me dokumente pasi ishte informuar nga Edi Rama për vendimin që do merrej.
“Të dashur miq, para se të vinit këtu, kryetarja e Gjykatës Antikushtetuese doli në konferencë shtypi.
Doli në konferencë shtypi dhe informoi një vendim të turpshëm, një vendim që dëshmon shkallën më të ulët të gjykimit dhe të përgjegjësisë.
Një vendim që është i barabartë me një të një gjykate fakti.
Një vendim që Gjykatën Kushtetuese e shpall jokushtetuese, antikushtetuese.
Edhe njëherë miq, ndjehem krenar që mbrojta Kushtetutën, qëndrova kundër puçit që i bëri parlamentit një grusht horrash në organizatën kriminale të Skapit të partisë dhe gjykatësja me 5 mbiemra.
Mbrojtja Kushtetutën, ndarjen e pushteteve nga një puç i ulët.
Kurse Gjykata Kushtetuese, në një vendim të turpshëm, quan joproporcional, nuk bën fjalë se i merret pushteti parlamentit me vendimin ekstrakushtetuese, ekstraligjor.
Një kapitull tjetër i turpit, i paralajmëruar 10 ditë më parë nga Ulsi Manja me dokumente se Rama na njoftoi për vendimin që do merrej.”- deklaron Berisha.
LEXO EDHE:
Padia/ Gjykata Kushtetuese pranon pjesërisht kërkesën e Sali Berishës
