Meteorologu i njohur Hakil Osmani tha se temperaturat në ditët në vazhdim, pritet që të bien.
Gjithashtu Osmani paralajmëroi se në veri-lindje të vendit pritet që të kemi reshje dëborë. Gjithashtu, meteorologu u shpreh se të premten priten reshje të dendura shiu, shoqëruar me erëra të forta.
“Nata vonë do jetë me vranësira dhe në mëngjes do kemi reshje shiu. Mesdita dhe pasditja nesër (të premten) pritet të ketë reshje të dendura shiu. Probleme do kemi në qarqet e veriut, por edhe në zona të tjera të vendit, në Tiranë, Elbasan, por probleme mund të ketë edhe në Durrës, Lezhë e Vlorë.
Era do të fryjë deri në 80 km/orë në det të hapur. Priten ulje të temperaturave dhe në veri-lindje pritet të bien reshje dëbore. Edhe të shtunën e të dielën do kemi ulje të temperaturave. Presim edhe prezencën e ngricës në rrugë, kryesisht në veri-lindje, prandaj shoferët duhet të kenë kujdes“, tha meteorologu Hakil Osmani për News24.
