Shqipëria barazoi 0-0 përballë Çekisë në një ndeshje ku kuqezinjtë nuk përmbushën pritshmëritë përballë publikut vendas.
Sfida në stadiumin “Arena Kombëtare” ishte e vlefshme për Grupin B1 në Ligën e Kombeve.
Pas ndeshjes, foli mbrojtësi i Kombëtares, Mario Mitaj teksa u shpreh se skuadra ishte me fat për pikën e marrë, ndërsa sulmi dhe rastet e pakta për shënim ishin pikët e dobëta mbrëmjen e sotme.
“E dinim që Çekia është ekip shumë i fortë, sidomos fizikisht, bëmë gabim 20 minutat që i lamë të luajnë. Ato 2-3 raste që kemi duhet t’i shfrytëzojmë sa më mirë. Kishim fat, mbrojtëm mirë se nuk na shënuan gol vetëm duhet të përmirësojmë sulmin.
Plani ndonjëherë është thjesht të gjejmë sulmuesin, të fitojmë topin e dytë. Ky ishte plani të gjejmë sulmuesin kryesor.
Unë thjesht mundohem çdo lojë të përmirësoj këtë pjesë të lojës, që të dal më shumë dhe të ndihmoj në sulm. Do mundohem të dal më shumë dhe të ndihmoj skuadrën me rastet që do ketë”, u shpreh Mitaj për Klan TV.
