Policia e Tiranës mbrëmjen e djeshme ka kryer eksperimentin hetimor të urdhëruar nga Prokuroria, duke bërë disa prova, për vrasjen e 52-vjeçarit Eduart Reci, atentat i ndodhur mbrëmjen e të mërkurës në mes të Tiranës, pranë Fakultetit të Histori Filologjisë.
Eksperimenti është bërë me qëllim për të zbuluar vendin dhe pozicionin që autori ka përdorur në momentin kur ka qëlluar me një plumb në kokë biznesmenin e ndërtimit.
Fillimisht grupi hetimor kishte dyshime se biznesmeni ishte qëlluar nga taraca e një ndërtese aty pranë, por pas kryerjes së eksperimentit hetimor, janë ngritur dyshime se autori ka qenë në një lartësi më të ulët. Më konkretisht, jo në taracë pallari, por brenda pallatit në një prej kateve më të ulët.
Dyshohet se qitësi ka qenë i pozicionuar në një pallat me ngjyrë të kuqe në afërsi të vendit të krimit. Deri më tani mbeten të paqarta shumë elementë të kryerjes së këtij krimi, por edhe pistat si dhe autorët.
Ndërkohë, grupi hetimor nuk ka gjetur as gëzhoja, por ka në dorë vetëm predhën e plumbit që qëlloi Reçin.
Nga hetimet paraprake, dyshohet se Eduart Reçi është qëlluar nga një pushkë e shkurtër sportive amerikane me dylbi, prodhim i viteve të fundit dhe nga një distancë jo shumë e largët. Kjo armë kur qëllon nuk bën aq zhurmë sa armët e zakonshme të zjarrit, si dhe e mban gëzhojën brenda në armë.
I filmuar nga kamerat e sigurisë, Eduart Reçi në momentin kur është qëlluar ka qenë duke përdorur celularin. Ky celular i viktimës është dërguar për ekspertim me shpresën se mund të zbulohet ndonjë e dhënë në komunikimet që ka pasur së fundmi.
Dyshohet se vrasja mund të jetë kryer nga një vrasës me pagesë dhe përdorues shumë i mirë i armëve.
Dëshmi në Polici ka dhënë djali i viktimës, i cili ka deklaruar se aktualisht babai i tij nuk ka pasur konflikte. Mësohet se Eduart Reçi në të kaluarën ka patur disa procese gjyqësore në lidhje me konflikte pronësie, por që ishin zgjidhur.
Para disa vitesh, 52-vjeçari ka qenë drejtor në një prej drejtiorive të institucionit të Shërbimit Informativ Shtetëror, teksa vitet e fundit ka qenë i njohur për aktivitetin e tij në ndërtim, pasi ka ndërtuar disa pallate pranë zonës ku iu bë atentati dhe është pronari i kompanisë “ELGM.shpk”.
Biznesmi Eduart Reçi me origjinë nga Dibra ishte babai i dy fëmijëve. Mësohet se pallatin ku jetonte, viktima e kishte ndërtuar vetë.
