Apeli i Gjykatës së Posaçme të Shkallës së Dytë (GJKKO) ka lënë në fuqi vendimin e shkallës së parë për dënimin me burg të përjetshëm për Laert Haxhiun.
Haxhiu ishte shpallur fajtor për Masakrën e Lushnjes e cila përfundoi me vrasjen e Zamir Latifit dhe Jurgen Hoxhës, si dhe plagosjen e Marjus Xhepexhiut dhe Bujar Turkut.
Në seancën e zhvilluar, avokati mbrojtës i Haxhiut, Detar Hysi, kërkoi prishjen e vendimit të shkallës së parë dhe rigjykimin e çështjes me një trup gjykues të ri, duke insistuar se klienti i tij ishte i pafajshëm.
Nga ana tjetër, prokurori Altin Dumani mbështeti vendimin e shkallës së parë dhe kërkoi lënien në fuqi të dënimit me burg përjetshëm, duke theksuar se provat ishin të mjaftueshme për të dënuar Haxhiun. Ai po ashtu bëri të qartë se ekzistenca e një grupi kriminal të strukturuar ishte provuar, dhe se vrasjet ishin kryer si pasojë e një konflikti mes Haxhiut dhe kundërshtarit të tij, Xhuljo Shkurti.
