Një peshkaqen i bardhë “fantazmë” është zbuluar në brigjet e Shqipërisë.
Peshkaqeni ( Oxynotus centrina ) u kap nga një peshkarekë tregtare pranë ishullit të Sazanit, në një thellësi prej rreth 200 metrash dhe ka tërhequr vëmendjen e mediave ndërkombëtare.
Peshkaqeni është i pari nga speciet e tij që zbulohet se ka leucizëm, një çrregullim gjenetik që prish prodhimin e melaninës, duke shkaktuar një reduktim të pigmentimit. Ndryshe nga albinizmi, prej të cilit mungon plotësisht melanina dhe kanë irise të kuqe, peshkaqenët leucistic kanë pigmentim normal të irisit edhe pse janë plotësisht të bardhë.
“Me leucizmin, një individ mund të prodhojë ende melaninë, por i mungon në zona të caktuara ose në të gjithë trupin. Ky peshkaqen ishte leucist dhe jo albino, sepse ishte dukshëm i zbehtë me njolla pothuajse të bardha në bisht, por sytë tregonin pigmentim normal të retinës,”- i tha “Live Science“ Andrej Gajiç, drejtor i Sharklab ADRIA në Shqipëri.
Studimi, i botuar më 16 tetor në Journal of Fish Biology është përshkrimi i parë i leucizmit në peshkaqen. Por shëndeti i peshkut duket i pandikuar nga leucizmi.
“Disa kërkime pretendojnë se mungesa e pigmentimit mund t’i bëjë individët më të dukshëm si për grabitqarët ashtu edhe për gjahun, duke reduktuar potencialisht shanset e tyre për të mbijetuar,“- tha Gajiç.
Por ky zbulim, së bashku me të dhënat e tjera të peshkaqenëve të shëndetshëm me çrregullime të pigmentit, nënkupton që këto anomali nuk kanë një ndikim të rëndësishëm negativ në aftësinë e peshkaqenëve për t’u ushqyer, për të shmangur grabitqarët ose për t’u riprodhuar.
Çrregullimet e pigmentit janë “jashtëzakonisht të rralla” në mesin e peshkaqenëve dhe vetëm 15 raste janë dokumentuar.
Vlora, rajoni ku u kap peshkaqeni, mund të jetë një pikë e rëndësishme për kërkimet. Specie të tjera të rrezikuara gjenden po ashtu në këtë zonë, duke përfshirë peshkaqenët e vegjël gulber ( Centrophorus uyato ) dhe fluturat me gjemba ( Gymnura altavela ).
