Nga Boldnews.al
Ligji i ri për Policinë e Shtetit u prezantua si një zgjidhje shumë e mirë për të larguar nga drejtimi “xhaketat e vjetra”, mbi të cilët ka pasur shumë akuza për korrupsion e lidhje me krimin e organizuar dhe për të vendosur “njerëz të rinj”, të cilët do t’i ndryshojnë fytyrën dhe qasjen e uniformave blu.
Por ky proces i mirëpritur nga opinioni publik, zbehet ndjeshëm gjatë zbatimit në praktikë. Së fundmi, Komisioni i Posaçëm i ngritur në Policinë e Shtetit për të vlerësuar kandidatët për postin e drejtorëve të qarqeve, ka publikuar listën me pikëzimin e secilit prej tyre.
Në top-dhjetëshen me pikët më të larta është edhe emri i Erion Ahmetit. Për ata që ky emër mund të jetë harruar pakëz, “Boldnews.al” po risjellë në vëmendje se pak vite më parë, Ahmeti ka qenë shefi i qarkullimit rrugor në Drejtorinë e Policisë së Tiranës.
Ahmeti ka mbajtur këtë detyrë prej vitit 2018 deri kur u shkarkua me urdhër të ish-drejtorit të Përgjithshëm të Policisë, Gledis Nano, në vitin 2021.
Gjatë drejtimit të Rrugores nga Erion Ahmeti, Tirana u shndërrua në “parajsën” e betoniereve. Megjithëse kishte rregulla për qarkullimin e kufizuar të mjeteve të tonazhit të rëndë gjatë orëve të ditës në rrugët kryesore të kryeqytetit, makineritë e rënda të “oligarkëve” të ndërtimit lëviznin të pashqetësuara nga qendra e deri në periferi.
Shumë ankesa të qytetarëve, por edhe të politikanëve, për bllokimin e rrugëve, zhurmën dhe pluhurin që shpërndaheshin nga betionieret nuk u morën asnjëherë në konsideratë nga ish-drejtori i Rrugores, Erion Ahmeti, i cili refuzonte të merrte masat e nevojshme.
“Parajsa e betioniereve” ishte vetëm njëra anë e historikut jo shumë prestigjioz të Ahmetit.
Të dhënat e publikuara nga mesazhet SKY/ECC treguan se si grupe kriminale përgatisnin atentate, organizoheshin e lëvizin me automjete në të gjithë rrugët e Tiranës në periudhën mars-qershor 2020.
Për t’u rikthyer pas në atë kohë, Shqipëria u vendos nën shtet-rrethim për shkak të virusit Covid-19.
Në rrugë lejoheshin të qarkullonin vetëm automjetet e shërbimeve më të nevojshme, si makinat e policisë, ambulancat e zjarrëfikëset, si edhe mjete të tjera, të cilat pajiseshin me leje të posaçme nga Policia Rrugore, të cilat kryenin funksione për emergjenca të caktuara.
Ndërsa, për shumicën dërrmuese të qytetarëve, për të paktën dy muaj, nuk u lejua qarkullimi i mjeteve. Por, ndërsa për qytetarët u vendosën masa të rrepta kufizuese lëvizjeje me automjete, për makinat e “çunave” që bëheshin gati për atentate duket se Policia Rrugore nuk kishte sy për t’i parë.
Tashmë, personazhi Erion Ahmeti, me shumë dritë-hije në karrierën e tij, renditet në “top-listën” e kandidatëve për drejtorë të rinj të policisë në qarqe. Madje, ai, me listimin i 10-ti, duket si pjesë e “listës së sigurt” të drejtorëve të rinj, duke i vendosur minat të gjithë procesit, nga i cili u shpresua se do të përzgjidheshin ‘elita e re” dhe jo-problematike e uniformave blu.
