Nga BoldNews.al
Shefi i Policisë Rrugore të Tiranës, Erion Ahmeti, është shkarkuar nga detyra, në vazhdën e lëvizjeve që ka përfshirë kuadrin e Policisë së Shtetit, pas emërimit të Gledis Nanos në Postin e Drejtorit të Përgjithshëm.
Burime konfidenciale për “Boldnews.al” deklaruan se konfirmimi për shkarkimin e Ahmetit pritet të formalizohet në orët ose maksimumi brenda pak ditëve.
Ndërkohë, Ahmeti, i cili duket se është njoftuar për lëvizjen e tij, prej ditësh nuk ka nënshkruar asnjë praktikë institucionale dhe firmosja e dokumentave administrativë i ka kaluar përkohësisht një prej vartësve të tij.
Po ashtu, të njëjtat burime thonë për redaksinë se Erion Ahmeti pritet të transferohet në Komisariatin e Tropojës, me shumë mundësi për të dhënë përvojën e tij në menaxhimin e trafikut të mjeteve në qytetin verior.
Në këtë mënyrë duket se u “fik kandili” i kryepolicit rrugor të Tiranës, i cili ka shënuar si suksesin e tij më të madh në kryeqytet legalizimin e lëvizjes së betonierëve dhe makinavë të rënda në çdo orë të ditës, duke krijuar kaos, trafik, pluhur dhe bllokim të lëvizjes së lirë.
