Një sherr mes dy të rinjëve është regjistruar mbrëmjen e kësaj të premte në Gjirokastër, ku konflikti ka degraduar deri në përdorimin e thikës nga njëra palë, duke e plagosur rëndë tjetrin.
Autoritetet policore raportojnë se konflikti ka ndodhur mes shtetasit L. H., 21 vjeç, banues në lagjen “Kodra e Shtufit” në Gjirokastër, me shtetasin, L. Dh., 29 vjeç, banues në Fier.
Ky i fundit e ka goditur me thikë 21-vjeçarin, teksa konflikti mes tyre dyshohet se ka qenë i çastit për motive të dobëta.
I riu është paraqitur fillimisht në spitalin e Gjirokastër për të marrë ndihmë mjekësore, por më pas është dërguar për mjekim më të specializuar në spitalin e Traumës në Tiranë.
Policia njofton se po punojnë për kapjen e shtetasit L. Dh. Grupi hetimor vijon punën për zbardhjen e plotë të rrethanave të ngjarjes në fjalë.
