Policia ka arrestuar në pikën kufitare të Kapshticës 39-vjeçarin nga Elbasani, Andri Mehja, i cili ishte shpallur në kërkim nga SPAK që më 29 Maj.
Mbi të rëndojnë akuzat për veprat penale “Korrupsioni pasiv i personave që ushtrojnë funksione publike” dhe “Shpërdorimi i detyrës”.
Mehja ka qenë drejtuesi i IMT-së në Bashkinë e Elbasanit dhe u denoncua nga emisioni “Stop” në lidhje me një ngjarje ku një biznesi në qytetin e Elbasanit i kishin vënë një gjobë për ndërtimin e një tende pa leje
Me anë të një sekseri, Andri Mehja, i ka kërkuar qytetarit një ryshfet prej 2 milionë e gjysmë Lekë për të reduktuar masën e gjobës nga 17 milionë në 5 milionë Lekë.
“Ai dyshohet se në muajin prill 2024, ka shpërdoruar detyrën si punonjës i IMT Elbasan, duke mos marrë masa për prishjen e një objekti të ndërtuar pa leje, për shkak se kishte marrë ryshfet.” – thuhet në njoftimin e Policisë.
Kujtojmë se pas denoncimit, kryeinspektori Andri Mehja u shpall në kërkim bashkë me vartësin e tij, inspektorin Bardhyl Qehja. Andri Mehja njihet në Elbasan si vëllai i dhëndrit të ish-kryebashkikaut të Elbasanit, Qazim Sejdini.
Zyrtar i IMT/ Vëllai i dhëndrit të Qazim Sejdinit merr ryshfet 2.5 mln lekë për të ulur gjobën
