Grupi parlamentar i Partisë Socialiste ka bërë mbledhjen e radhës paraditen e kësaj të hëne në Kryesinë e Kuvendit, teksa janë zbardhur edhe detajet nga diskutimet e deputetëve socialistë.
Burime për mediat bëjnë me dije se janë zhvilluar diskutime mbi buxhetin e shtetit për vitin e ardhshëm dhe prioritetet për projektet kryesore sociale dhe ekonomike.
Mësohet se sipas propozimit të PS-së, më 4 nëntor nis diskutimi për buxhetin. Më 18 nëntor do të miratohet në Kuvend në parim, ndërsa me 2 dhjetor do të miratohet nen për nen. Këto janë propozimet e Partisë Socialiste.
Gjithashtu, në fokusin kryesor kanë qenë dhe mitingjet që po zhvillon kryeministri Edi Rama me shqiptarët e diasporës, ku më 3 nëntor pritet të jetë në Selanik të Greqisë, ndërsa më 24 nëntor do të jetë në Londër të Mbretërisë së Bashkuar. Burime bëjnë me dije se është kërkuar mobilizim nga strukturat e PS-së për të siguruar sa më shumë njerëz në këto tubime.
Ndërkohë, deputetëve u është dhënë dhe udhëzimi të intensifikojnë takimet me qytetarët në zonat që përfaqësojnë, veçanërisht me pensionistët, për t’iu shpjeguar ndryshimet në skemën e re të pensioneve që do të aplikohet me buxhetin e ri.
