Simone Inzagi ka analizuar fitoren e arritur me vuajtje nga skuadra e Interit dhe thotë se në këtë kompeticion ndeshjet nuk janë aspak të lehta.
Sipas teknikut italian, skuadra vuajti edhe mungesat e Çalhanoglusë dhe Kristjan Asllanit.
“Ishim duke luajtur në Champions. Të gjitha ndeshjet janë të vështira. Skuadrat italiane që kanë luajtur këtu kanë vuajtur sepse nuk është e lehtë të luash në këtë fushë. I humbëm distancat në disa momente, por kishim raste për ta fituar. Skuadra tregoi zemër dhe e merituam”, tha fillimisht trajneri zikaltër.
Megjithatë këtë ndeshje e vendosën titullarët… Kjo do të thotë se ata u futën mjaft mirë në fushën e lojës, ashtu siç bënë edhe ndaj Romës. Unë kam një organikë të pasur, pavarësisht se tani kemi disa dëmtime. Duhet që të jemi të zotët për të rikuperuar energjitë sepse kemi një tur force dhe ndeshje të vështira.
Sa ndryshon Interi pa Çalhanoglunë? Është një lojtar i rëndësishëm. Na mungoi edhe Asllani. Barelës dua thjesht që t’i bëj komplimentet për atë që bëri si këtë herë ashtu edhe me Romën. Shpresojmë që të mos kemi më emergjencë, por sakrifica nga të gjithë na duhet”, deklaroi tekniku i zikaltërve.
