Bekim Balaj vijon të mungojë për Vllazninë. Sulmuesi, i cili nuk ishte i gatshëm për shkodranët as në ndeshjen e fundit kundër Laçit, vijon të mungojë në stërvitje për shkak të një dëmtimi që e ka detyruar të ndalet.
Balaj nuk ishte i pranishëm as ditën e djeshme në seancën stërvitore të kuqebluve, çka shton ndjeshëm shanset që ai të mund të mungojë edhe në duelin e radhës kundër Partizanit.
Pavarësisht se dëmtimi i 33-vjeçarit në fillim nuk u mendua i rëndë, pasi parashikohej të mungonte vetëm 3-4 ditë, diçka e tillë nuk ka ndodhur dhe situata duket ende e paqartë. Megjithatë në ditët në vijim do të qartësohet akoma më tepër nëse ish-sulmuesi i Kombëtares do të jetë i gatshëm në fundjavë apo jo.
Edhe nëse sulmuesi do të arrijë të rikuperohet për këtë ndeshje, vështirë që Brdariç të rrezikojë për ta aktivizuar nga minuta e parë.
