Avokati Eugen Beçi, duke komentuar masën e arrestit me burg për ish-presidentin Ilir Meta, u shpreh në emisionin “Të Paekspozuarit”, se nëse do të ishte prokuror ai do të kishte dhënë disa masa të tjera në vend të burgimit.
“Meta ka qenë gjithmonë nën hetim dhe njoftimi i akuzave dhe njohja e dyshimeve të arsyeshme për të marrë një person nën hetim është i mjaftueshëm me ato që thotë.
Përsa i përket caktimit të masave të sigurimit, unë e kam thënë, dhe jo për Metën dhe jo gjithkënd. Arresti në burg është një masë e jashtëzakonshme nga ana e SPAK-ut.
Ka procedura penale që kanë të bëjnë me rrezikshmërinë e personit, mundësinë e personi që ndikon për të prishur provat duke i marrë me radhë, rrezikshmëria e personit për t’u larguar bie, sepse ky është një person që është paraqitur disa herë në Prokurorinë e Posaçme, nuk i është shmangur.
Mundësia për të prishur provat bie, se kemi kallëzimin e parë në vitin 2019 e deri më sot janë konsoliduar dhe janë kristalizuar.
Mundësia për të kryer një vepër tjetër penale është një mundësi zero, dhe kjo sepse nuk është më në detyrat që ka patur kur ka kryer veprat penale të supozuara dhe për të tërë këto elemente, arresti në burg është i tepërt dhe është një masë ekstreme.
Shumë herë e kemi parë që prokurori e posaçëm e lëshon dorën për sa i përket masave të sigurimit. Ai përket masave të sigurimit. Është tjetër gjë hetimi, tjetër gjë fakti që merret nën hetim ish-presidenti i Republikës.
Unë mendoj që do të ishte treguar më e rezervuar dhe me një masë tjetër më të butë që do t’i përshtatej faktit penal dhe rrezikshmërisë së personit.
Unë p.sh do ta lija në arrest shtëpie, detyrim paraqitje, lirim kundrejt garancisë pasurore, ndalimi për dalje jashtë shtetit.
Fatmirësisht, kodi ynë i Procedurës Penale ka shumë masa të tjera, dhe shtrënguese dhe ndaluese, por prokurorëve, jo vetëm Prokurorisë së Posaçme, por të gjithë Shqipërisë i ka ngelur shigjeta te arresti në burg dhe nuk e ndërrojnë më prej aty”- tha Beçi.
