Mësuesi i anglishtes në shkollën 9-vjeçare të fshatit Jagodinë në Elbasan, Erion Kushi, është pezulluar nga puna, për shkak të një incidenti të paprecedent. Masa e pezullimit nga puna është caktuar deri në zbardhjen e ngjarjes nga drejtësia.
Dyshohet se Erion Kushi ka kërcënuar prindin e një nxënësi të shkollës dhe më pas e ka lagur me benzinë.
Prindërit e nxënësve pretendojnë se mësuesi sillej jo profesionalisht me nxënësit në klasë, duke i bullizuar dhe duke ushtruar ndaj tyre presion psikologjik të vazhdueshëm.
“Shtetasi Erion Kushi , 34 vjeç, me profesion mësues ka kanosur shtetasin I. Kasa sepse pretendon se ky i fundit i ka dëmtuar imazhin si mësues. Më tej, në deklarimin e tij, shtetasi I. Kasa pretendon se përveç kanosjes me fjalë, 34-vjeçari ka hedhur në drejtim të tij, një bidon dyshohet me lëndë djegëse (benzinë) që e ka marrë në automjet.”- njofton policia.
Materialet procedurale i kaluan Prokurorisë së Elbasanit, për të vijuar hetimet për veprat penale “Kanosja” dhe “Vetëgjyqësia”.
