Komisioni Qëndror i Zgjedhjeve i kaloi sot mandatin e deputetit Andrea Manos, i cili do të zëvendësojë në Kuvend Ervin Salinjin në Qarkun e Korçës.
Sipas KQZ-së, kandidati Andrea Mano ka dorëzuar formularin e vetëdeklarimit brenda afateve të përcaktuara ligjore. Pas verifikimeve, është konstatuar se nuk ka ndryshime në gjeneralitete apo dënim me vendim të formës së prerë.
“Të dhënat e deklaruara konstatohet se nuk përbëjnë kusht për moszgjedhjen e tij si deputet i Kuvendit të Shqipërisë”, tha përfaqësuesja e KQZ-së gjatë mbledhjes sot.
Andrea Mano ka mbajtur postin e Prefektit të Qarkut të Korçës gjatë qeverisjes së PD, teksa më pas ka qenë kryetar i degës së PD-së në qytetin juglindor.
Pas humbjes së zgjedhjeve të vitit 2021 Mano dha dorëheqjen nga posti i kreut të PD-së së Korçës, pas pakënaqësive ndaj Lulzim Bashës dhe për 3 vite ka qëndruar jashtë politikës aktive.
Gjykata e Apelit dënoi më 26 shtator me 1 vit burgim Ervin Salianjin për shkak se i prishi imazhin Qeverisë duke denoncuar Geron Xhafajn, vëllain trafikant droge të ish-ministrit Fatmir Xhafaj. Prej 27 shtatorit ai ndodhet në burgun e Fierit.
Partia Demokratike e ka konsideruar këtë vendim si një hakmarrje politike të Edi Ramës dhe Fatmir Xhafajt dhe të pambështetur në prova dhe në ligj.
