Tre miliardë lekë më pak mallra në tregjet e huaja me të gjithë treguesit ekonomik që kontribuojnë negativisht, por dhe 2 miliardë lekë më pak konsum në vend, është ky raporti mes produkteve që blejmë dhe shesin në vendin tonë.
Bilanci i tregtisë së jashtme në muajin shtator tregon se drama e krijuar në këtë sektor u thellua si tek eksportet dhe importet.
“Është ekstremisht shqetësuese, nuk e kam parë kurrë një grafik ku të gjithë treguesit janë negative. Duhet se zbën që qeveria të krijoj një komitet urgjence me një plan masash urgjente për tu kthyer në normalitet e cila i ka të gjithë treguesit e mundshëm të një krize ekonomike”, tha për A2 CNN, Alban Zusi nga Shoqata e Eksportuesve shqiptarë.
Në raftet e bizneseve shqiptare mbizotërojnë mallrat e huaja. Ndonëse nga prodhimi vendas shitëm 31 miliardë lekë, bizneset blenë 71 miliardë lekë mallra.
Përveç eksporteve të cilët prej më shumë se 2 vitesh vuajnë pasojat e zhvlerësimit të euros kundrejt lekut vendas, një rënie të importeve ekspertët e tregut e lidhin situatën edhe me uljen e ndjeshme të konsumit në vend.
“Përveç eksporteve kemi dhe rënie të importeve dhe rënia e saj tregon një rënie të konsumit të brendshëm. Kësaj i bashkëngjiten dhe shifrat e emigrimit që s’do të punojë më këtu”, nënvizoi Zusi.
Për shkak të rënies së eksporteve dhe rritjes së importeve muajin e kaluar, u thellua dhe më tej deficiti tregtar, i cili arriti në 40 miliardë lekë . Ky deficit vijon të jetë ndër më të lartët në 3 vitet e fundit./ A2CNN
