Policia e Tiranës ka ekzekutuar një operacion gjatë natës së kaluar, hetimet e të cilit janë drejtuar prej 12 muajsh nga shefi i Prokurorisë së Tiranës, Arenc Çela dhe prokurori Ritvan Suka, për goditjen e një grupi kriminal që merrej me trafikun e emigrantëve të paligjshëm.
Ky hetim ka nisur që në vitin 2023, teksa në total janë individualizuar si përgjegjës 24 persona. Kryepolici i Tiranës, Tonin Vocaj në një konferencë shtypi bëri me dije se për 5 prej tyre masat e sigurisë janë ekzekutuar më herët, ku të cilët 3 hetohen me masën e sigurisë “Arrest në burg”, pa afat, ndërsa 2 me masën e sigurisë “Detyrim paraqitje”.
Së fundmi, Prokuroria e Tiranës ka lëshuar në mungesë dhe 19 masa të tjera sigurie “Arrest me burg”, ku blutë e kryeqytetit kanë arrestuar në kuadër të operacionit të koduar “DAMASK”, vetëm 15 prej tyre dhe 4 të tjerë janë shpallur në kërkim.
Vocaj deklaroi se nga 15 shtetasit e arrestuar, tre prej tyre janë me kombësi egjiptiane dhe siriane, ndërsa për 4 të shpallurit në kërkim rezulton se 3 prej tyre ndodhen jashtë vendit dhe po ndiqen procedurat urgjente për shpalljen në kërkim ndërkombëtar të tyre.
Burime bëjnë me dije se pjesë e këtij grupi kriminal kanë qenë 20 shtetasit: Rafael Demaj, Enriko Gjonaj, Mehmet Bregu, Arnold Kërçi, Khaled Shahin, Ahmed Kensowa, Dashamir Kullaj, Mohammed Alfahel, Nazmi Avxhija, Juljan Avxhija, Florenc Avxhija, Klajvert Avxhija, Klaudi Mano, Trilind Gjana, Elton Ukaj, Eurel Ukaj, Kelti Xhani, Kastriot Xhani, Ilirjan Xhaferri dhe Mikel Stefani.
Ende nuk dihet identiti i 4 personave të shpallur në kërkim. Mësohet se dy prej të arrestuarve dhe që dyshohet se kanë pasur rolin kryesor në këtë trafik refugjatësh janë Ahmed Kensowa dhe Dashamir Kullaj.
“Shtetasit e implikuar në këtë veprimtari kriminale iu kanë dhënë ndihmë për kalim të paligjshëm të kufirit, shumë shtetasve, kryesisht nga Lindja e Mesme, të cilët hynin në Shqipëri nga Greqia dhe tranzitoheshin në drejtim të kufijve veriorë të Shqipërisë, në Malin e Zi dhe në Kosovë. Gjatë hetimit është dokumentuar përtej çdo dyshimi të arsyeshëm së shtetasit e huaj janë organizatorë dhe financues të kësaj veprimtarie kriminale. Gjatë zhvillimit të hetimeve janë përdorur veprime stimuluese si dhe teknika të posaçme hetimore me mbështetjen e Forcave Operacionale. Në një episod, gjatë hetimit është bashkëpunuar dhe me emisionin investigativ “Piranjat”. Po kështu, në fazën finale të operacionit është bashkëpunuar me Drejtorinë Vendore të Policisë Kukës, Durrës, Shkodër dhe me Komisariatin e Policisë Sarandë, në Drejtorinë Vendore të Policisë Vlorë.” – tha Vocaj.
Në kuadër të këtij hetimi, uniformat blu kanë sekuestruar 10 automjete, rreth 20 mijë euro dhe 500 000 lekë, 24 celularë, 10 pasaporta dhe fotokopje pasaportash të shtetasve egjiptianë dhe sirianë.
Burime bëjnë me dije se emigrantët, kryesish egjiptianë dhe sirianë, vinin në mënyre të rregullt nga aeroporti i Rinasit dhe Greqia. Më pas Shqipërinë ata e përdornin si tranzit për të shkuar në vendet e BE dhe kalimi ilegal bëhej nga Hani i Hotit në Shkodër dhe nga Morina në Kukës. Sipas burimeve mediatike, vlera qe u merrej nga trafikantër shkonte deri ne 1500 euro.
Policia e Tiranës ka publikuar edhe pamjet e operacionit, ku shfaqen momenti i arrestimit të të akuzuarve, si dhe sekuestrimi i parave.
