Gjykata e Korçës ka lënë në fuqi masat e sigurisë “arrest me burg” për tre shokët e Denis Meçes, i cili akuzohet për dhunimin deri në vdekje të Egli Progës, ngjarje e ndodhur më 10 Gusht të këtij viti në Pogradec.
Bëhet fjalë për shtetasit Leonidha Guçe, Arjan Manellari dhe Voltan Shulku, të cilët u rikthyen në qeli tre ditë më parë, pasi më herët ishin lënë në masën e sigurisë “ detyrim paraqitje”.
Ata akuzohen se kanë tentuar të fshehin ngjarjen, teksa mbi ta rëndodn akuza për veprën penale “Veprime që pengojnë në zbulimin e së vërtetës”.
Prokuroria e Korçës ka konkluduar se ka patur ndërhyrje në kamerat e brendeshme të sigurisë të lokalit ku u dhunua duke gjetur më pas vdekjen Egli Proga. Pamjet filmike janë fshirë qëllimisht me virus, teksa organi i akuzës bëri me dije se është në proces të rikthimit të tyre.
Pasditen e 10 gushtit në lagjen 1 të Pogradecit, 42-vjeçari Egli Proga, baba i dy fëmijëve, u dhunua për vdekje nga Denis Meçe ndërsa autori u largua nga vendngjarja. Ai u vetëdorëzua disa orë më vonë ndërsa në pranga përfunduan edhe 3 personat të cilët deklaruan se nuk kishin parë asgjë nga ngjarja e rëndë.
Vlen të theksohet fakti se fillimisht, autoritetet policore e referuan dosjen ndaj Denis Meçes në Prokurori nën dyshimet për kryerjen e veprës penale “Vrasje me dashje”, akuzë e cila sipas Kodit Penal të Shqipërisë dënohet nga 10 deri në 20 vjet burgim. Por, pas 40 orësh Prokuroria e Korçës zbuti akuzën 29-vjeçarit, pasi depozitoi dosjen në Gjykatë për rivlerësimin e masave të sigurisë për veprën penale “Vrasje nga pakujdesia”. Kjo vepër penale dënohet me gjobë ose maksimumi me burgim deri në 5 vjet.
Kjo ngjarje e rëndë bëri bujë mediatike, për shkak se familjarët akuzuan institucionet për mosveprim në kohë dhe tentativë për të fshehur ngjarjen, pasi Denis Meçe njihet si një person problematik në zonë, kjo edhe për shkak se kishte mbështetjen e dajës së tij, Valter Gora, një ish-drejtor me “pushtet rilindas” në Pogradec, i cili ka mbajtur poste të rëndësishme në juglindje, i përfshirë në shumë afera, si dhe i arrestuar për korrupsion.
Më pas, pati dhe një “ping pong” mes Prokurorisë së Korçës dhe Policisë së Shtetit se kujt do t’i ngecte faji.
