Me ndeshjen Tirana-Vllaznia, mbrëmjen e djeshme në kryeqytet, është hapur java e pestë në Superligën e volejbollit për meshkuj.
Bardheblutë nuk falën në sallën “Farie Hoti”, duke triumfuar me rezultatin 3-1, për tu rikthyer te fitoret pas humbjes në javën e kaluar në derbin kundër Studentit.
Seti i parë nisi me një epërsi të lehtë të shkodranëve, por në fund Tirana ishte më e qartë në veprimet e saj, ndërsa Emiljan Xhebrahimi fiksoi shifrat 25-22.
Vllaznia gjeti forca në setin e dytë, duke e komanduar lojën nga fillimi e deri në fund në këtë fraksion, me Gilman Talanin që vulosi rezultatin 20-25, duke vendosur baraspeshën.
Në setin e tretë bardheblutë ishin dominues, set që u mbyll në shifrat 25-19 me një pikë nga shërbimi e Aldo Kupit. Sfida u mbyll me një bllok fitues nga Julian Talaj, protagonist i “match point”-it, duke vulosur setin 25-21 dhe të gjithë ndeshjen 3-1.
