Ekspertja e marrëdhënieve ndërkombëtare, Ilda Zhulali, ngriti shqetësime lidhur me rolin e kryeministrit Edi Rama në përçarjen fetare në Shqipëri.
Duke iu referuar vizitës së presidentit turk Erdogan, ajo theksoi rëndësinë e ruajtjes së kufirit midis fesë dhe politikës, një traditë e vendosur në Shqipëri. Zhulali shpreh shqetësimin se kryeministri Rama, duke e thyer këtë kufi, ka hapur rrugën për përçarje të mëtejshme fetare në vend. Sipas saj, Rama, përmes veprimeve të tij të fundit, ka hedhur “farën e përçarjes fetare” në Shqipëri brenda një periudhe prej tre javësh.
“Së pari, Turqia është një vend mik, një vend me të cilin na lidh një histori e gjatë që ka pasur ulje-ngritje, por me të cilin vitet e fundit kemi ndërtuar marrëdhënie të shëndosha bashkëpunimi dypalësh, që i shërbejnë interesave të secilit vend, si të Turqisë ashtu edhe të Shqipërisë. Pika ku takohen këto interesa shënon pikëtakimin dhe konsolidimin e bashkëpunimit dypalësh. Nuk është e thënë që vendet të kenë gjithmonë të njëjtat interesa, ka edhe pika ku ndahen, patjetër.
Ardhja e presidentit Erdogan në Shqipëri është një lajm i rëndësishëm. Turqia është një vend i rëndësishëm, veçanërisht në kuadër të zhvillimeve të fundit. Turqia, një vend anëtar i NATO-s, një fuqi e madhe ushtarake, dhe një vend që ka mbajtur një peshë shumë të madhe në krizën e emigrantëve dhe zhvillimet në Lindjen e Mesme, përfshirë raportin me Rusinë dhe vendet e tjera të Lindjes së Mesme, e bën të rëndësishme vizitën e Erdogan në këtë kohë.
Ne nuk duhet ta zbehim rëndësinë e kësaj vizite në rrafshin diplomatik. Mesazhet që ai solli në Tiranë ishin të pritshme. Unë padyshim prisja që ajo që po ndodh mes Izraelit dhe Palestinezëve të ishte një nga çështjet e ngritura. Kjo është e natyrshme, është në vëmendjen e gjithë botës. Mendoj se gjëja më e natyrshme ishte që të shfaqej kjo në takimin me presidentin dhe kryeministrin, përfaqësuesit politikë të Shqipërisë. Xhamia është një objekt kulti, ku besimtarët i luten Zotit, dhe aty ka një komunikim tjetër.
Nuk ishte vendi i duhur, sipas mendimit tim, për të dhënë atë mesazh, të cilin Erdogan gjithsesi pati mundësinë ta shprehte edhe gjatë takimit me kryeministrin. Aq më tepër që të bënte një thirrje mobilizuese, siç e ka bërë edhe më herët, për botën myslimane në tërësi, që të reagojë ndaj asaj që po ndodh në Gaza, apo për mënyrën si duhet reaguar ndaj Izraelit. Mendoj që kjo ishte e pavend. Siç thashë, nuk më pëlqeu fakti që thyhen disa rregulla që ne i kemi të vendosura si një traditë e mirë në Shqipëri. Ne e kemi të ndarë fenë nga politika, jemi një shtet laik dhe kemi vendosur një bashkëjetesë të shëndetshme me disa kufij të qartë.
Unë nuk jam e shqetësuar për kalimin e këtij kufiri nga Erdogani, por jam e shqetësuar për kalimin e kufirit nga kryeministri i vendit tim, sepse është ai që e shkel këtë kufi i pari, dhe duke e shkelur ai, pastaj e hap territorin për shkelje të tjera që mund të vijnë nga njerëz me interesa politike të ndryshme. Ne kemi një kryeministër i cili, brenda tre javësh, ka hedhur farën e përçarjes fetare në Shqipëri.”– tha Zhulali për “Çim Peka Live” në Syri Tv.
