Gjykata e Posaçme Kundër Korrupsionit dhe Krimit të Organizuar ka shpallur fajtor ish-kryebashkiakun e Lushnjës Fatos Tushe për “fshehje e mosdeklarim të pasurisë”.
Tushe u dënua me 1 vit e 6 muaj burg. Për shkak të gjykimit të shkurtuar dënimi u ul në 1 vit. Ndryshe nga SPAK, që kërkoi vetëm dënim me burg, përfundimisht gjykata ka vlerësuar të pezullojë ekzekutimin e dënimit me burg për Tushen, duke e lënë atë në Shërbim Prove për dy vite.
Vetëm pak muaj pasi shleu dënimin me 3 vite e 4 muaj burg për shpërdorim detyre dhe shkelje të barazisë në tendera, ndaj Fatos Tushes nisi një tjetër hetim që ka të bëjë me pasurinë. Bëhet fjalë për një apartament në Lungomare të cilin nuk e ka deklaruar dhe mobilimin në vlerë 2.2 mln lekë, si dhe as blerjen e dy makinave me vlerë 46.910 euro.
Dënimi i ishte kundërshtuar nga avokati i Tushës, Dritan Trifka. Në konkluzionet përfundimtare avokati i ka kërkuar gjykatës pezullim të dënimit me burg dhe lënien e klientit në Shërbim Prove. Avokati ka sjellë si raste analoge kërkesat e SPAK për ish gjyqtarët Fatos Lulo dhe Bashkim Dedja, të gjykuar për të njëjtën akuzë dhe për të cilët SPAK ka kërkuar dënim alternativ dhe jo burg. Në këtë proces Tushe është hetuar dhe gjykuar pa asnjë masë sigurie.
