170 persona kanë përfunduar në spital me shenja helmimi në Dibër prej së dielës, teksa ngjarja u përpoq të mbahej e fshehtë nga autoritetet.
Sipas mjekëve, pacientët kanë pasur dhimbje barku apo të vjella ndërsa dyshimet janë për një helmim.
Personat që janë paraqitur në spital janë nga fshatrat e Njësive Administrative Kastriot, Arras dhe Fushë Çidhën, të cilët furnizohen më ujë nga ujësjellësi i Saponikës. 100 prej pacientëve janë në Pediatri.
Dyshimet e para janë se helmimi është krijuar pikërisht nga uji ndërsa mendohej se situata ka ardhur nga sasia e madhe e klorit.
Janë marrë mostra që janë çuar për analizim në Tiranë.
Kujtojmë se kjo nuk është hera e parë që në qarkun e Dibrës përfundojnë në spital persona me shenja të helmimit nga uji. Raste të tilla ka pasur në Bulqizë edhe pak muaj më parë.
- PD denoncon se situata alarmante po mbahet e fshehtë
Partia Demokratike Dega Dibër ka denoncuar situatën alarmante në të cilën ndodhen banorët e Njësive Administrative Kastriot dhe Fushë Çidhën, të cilët janë helmuar masivish nga kontaminimi i ujësjellësit të Sopanikës.
PD Dibër thekson se “dje dhe sot gjithë ditën urgjenca dhe spitali plot me banorë të helmuar, fëmijë, gra etj. me të vjella, me dhimbje të forta barku”, ndërkohë që nuk ka asnjë reagim nga Drejtoria e Shëndetit Publik Dibër, nga Drejtoria e Spitalit Dibër, nga Bashkia Dibër.
- Mziu denoncon se autoritet nuk morën masa
Drejtuesi politik i PD në qarkun Dibër, Xhelal Mziu deklaron se Ujësjellësi i Sopanikës në Bashkinë Dibër është i kontaminuar.
Ai denoncon se nga ana e autoriteteve përkatëse nuk është marrë asnjë masë, madje ata janë treguar të kujdesshëm që ta mbajnë të fshehur këtë rastprej dy ditësh.
