Gjykata e Apelit ka lënë në fuqi vendimin e Gjykatës së Shkallës së Parë në Gjirokastës për masat e sigurisë “arrest me burg” ndaj Andrea alias Adriatik Kalemi dhe të afërmit të tij Julian Kalemi.
Julian Kalemi kishte strehuar në banesën e tij 45-vjeçarin Andrew alias Edvin Bode, i cili ishte prej dy vitesh në kërkim, pasi akuzohet si vrasësi i Edmond Papës më 16 Dhjetor të vitit 2022 në zonën e Selitës në Tiranë.
Ndërkohë, Andrea alias Adriatik Kalemi posedonte arsenal armësh në banesë. 52-vjeçarit iu gjetën 1 armë zjarri automatike, 1 armë gjahu, 1 gjerdan fishekësh, fishekë luftarakë, 2 silenciatorë, 1 jelek antiplumb, 40 145 Euro, mbi 400 mijë lekë dhe 3470 dollarë.
Dyshohet se Andrea alias Adriatik Kalemi po përgatitet për hakmarrje për vrasjen e babait të tij, Shyqyri Kalemi, në masakrën e Memaliajt të regjistruar në muajin Qershor me 3 të vrarë dhe një të plagosur, ku dy prej viktimave ishin aksidentale.
Ndaj Julian Kalemit rëndon akuza për veprën “Përkrahja e autorit të krimit”, ndërsa ndaj Adriatik Kalemit akuzat për veprat penale “Mbajtja pa leje dhe prodhimi i armëve, armëve shpërthyesë dhe i municionit”, “Prodhimi dhe mbajtja pa leje e armëve të gjuetisë dhe sportive” dhe “Pastrimi i produkteve të veprës penale ose veprimtarisë penale”.
Andrew alias Edvin Bode i cili u arrtestua në të njëjtën ditë me ta, është marrë i pandehur bashkë me Albano Velon për vrasjen e Edmond Papës. Sipas hetimeve dyshohet se Papa u vra në shenjë hakmarrjeje për vrasjen e Aleksandër Sadikajt, i njohur si “Sanço” gjatë një atentati me minë të telekomanduar në Tiranë.
Po ashtu, edhe Adriatik Kalemi i ka shpëtuar dy atentateve, ndërsa vëllai i tij Zamir Kalemi një atentati. Vrasja e “Sanços” dyshohet se është ngjarja që ka çuar në një sagë vrasjesh për hakmarrje më pas mes dy fiseve në Memaliaj ku në total kanë mbetur 5 viktima.
