Ministria e Jashtme e Shqipërisë, e drejtuar nga Igli Hasani ka dënuar ashpër sulmin me raketa të Iranit ndaj Izraelit, duke e cilësuar si një përshkallëzim të konsiderueshëm që rrit kërcënimin ndaj sigurisë rajonale.
Përmes një reagimi në rrjetin social “x” Ministria e Jashtme shprehu solidaritetin me popullin izraelit dhe thekson se ka të drejtën e tij për t’u mbrojtur.
Gjithashtu, ministria e drejtuar nga Igli Hasani ripërsërit thirrjen për ulje të menjëhershme të tensioneve në Lindjen e Mesme.
“Shqipëria dënon ashpër sulmet e Iranit ndaj Izraelit dhe civilëve të tij. Kjo paraqet një përshkallëzim të konsiderueshëm, duke rritur kërcënimin ndaj sigurisë rajonale. Shqipëria solidarizohet me popullin e Izraelit dhe të drejtën e tij për të jetuar në siguri. Ne ripërsërisim thirrjen tonë për çtensionimin e menjëhershëm.”, thuhet në reagimin e MEPJ.
