Këshilli i Ministrave ka miratuar në mbledhjen e kësaj të mërkure emërin e Ilir Prodës në postin e Drejtorit të Përgjithshëm të Policisë së Shtetit.
Emri i tij u propozua dy ditë më parë nga Ministri i Brendshëm, Ervin Hoxha dhe sot nuk ka patur surpriza nga kryeministri Edi Rama, duke e zyrtarizuar. Lajmin e ka bërë ne dije vetë ministri i Brendshëm, Ervin Hoxha në prononcimin për mediat pas mbledhjes.
Ilir Proda pritet të zëvendësojë në postin e kryepolicit Muhamet Rrumbullakun, i cili u largua me dorëheqje në fillim të shtatorit. Pas dorëheqjes së Rrumbullakut, Ministria e Brendshme hapi një proces për ta përzgjedhur kreun e ri të Policisë me anë të një komisioni të posaçëm.
Sipas njoftimit të autoriteteve, Komisioni i Posaçëm në fund të procesit i dërgoi ministrit Hoxha emrat e 5 aplikantëve të kualifikuar Altin Mena, Ardian Çipa, Ilir Proda, Neritan Nallbati dhe Skënder Hita. Ministri i Brendshëm përzgjodhi emrin e Ilir Prodës për t’i dërguar Këshillit të Ministrave për postin e Drejtorit të Përgjithshëm të Policisë së Shtetit.
Kjo ngre hije dyshime se kemi të bëjmë me një garë të paracaktuar, pasi emri i Ilir Prodës doli në media që në nisje të procesit se do të ishte ai kryepolici i ri, siç dhe ndodhi.
Ndërkohë, vetëm pak kohë më parë, oficerët e BKH-së i sekuestruan telefonin Ilir Prodës dhe e morën në pyetje, pasi ishte një prej të dyshuarve për dekonspirimin e operacionit të SPAK kundër grupit të Franc dhe Hajdar Çopjave. Aktualisht telefoni i tij është i sekuestruar nga SPAK.
Mësohet se ditën e nesërme do të zhvillohet dhe ceremonia e marrjes së postit të Drejtorit të Përgjithshëm të Policisë së Shtetit nga Ilir Proda.
Pas emërimit të tij, do të hapet gara dhe konkursi për emërimin e 12 drejtorëve të qarqave vendore të Policisë së Shtetit dhe drejtorëve të departamenteve në Policinë e Shtetit.
Kreu i Policisë së Shtetit do ketë mandat 5-vjeçar, ndërsa Drejtorët e Drejtorive vendore, do të kenë mandat 3-vjeçar.
