Grupi Parlamentar i Partisë Demokratike pritet të mblidhet sërish ditën e sotme në selinë blu.
Në mbledhjen që pritet të nisë në orën 12:00, në fokus të diskutimit do të jetë përcaktimi i skenarëve të aksionit që do të ndjekin në seancën plenare të ditës së nesërme (3 Korrik) në Kuvend.
Opozita vijon prej tre ditësh bojkotin në komisionet parlamentare, teksa në seancën plenare të ditës së hënë shkaktoi tensione për moslejimin e zhvillimit të seancës normale, pas burgosjes politike të kolegut të tyre Ervin Salianji.
Ndërkohë, një ditë pas protestës në Kuvend, Policia e Tiranës procedoi penalisht dhe i referoi materialet në SPAK për 23 deputetë të opozitës.
Gjithashtu, socialistët i kërkuan Sekretariatit të Etikës përjashtimin e 24 deputetëve të PD-së, për ta lënë Kuvendin ashtu siç e preferon Rama, pa opozitë. Sekretariati i Etikës pritet të mblidhet në orën 15:00 për të marrë vendim.
