Ushtria izraelite i ka vazhduar të dielën sulmet ajrore ndaj grupit militant Hezbollah në Liban, një ditë pasi u konfirmua vrasja e shumë komandantëve të Hezbollahut, përfshirë Hassan Nasrallahun, liderin e kamotshëm.
Ushtria izraelite tha se forcat e saj ajrore goditën “dhjetëra shënjestra terroriste të Hezbollahut” në Liban, përfshirë “raketahedhës të cilët ishin kthyer në drejtim të tokës izraelite, struktura në të cilat ishin fshehur armët dhe infrastruktura të tjera terroriste të Hezbollahut”.
Kryeministri i Izraelit, Benjamin Netanyahu, e përshkroi vrasjen e liderit të Hezbollahut Nasrallah më 27 shtator si të domosdoshme drejt “ndryshimit të baraspeshës së pushtetit në rajon për vitet në vijim”.
Zyrtarët iranianë kërkuan një takim urgjent të Këshillit të Sigurimit të OKB-së, ndërsa kryetari i Parlamentit iranian premtoi mbështetje të vazhdueshme për grupet që përballen me Izraelin.
Ministri i Jashtëm iranian, Abbas Araqchi, u citua nga agjencia zyrtare e lajmeve Fars të ketë thënë në Nju Jork se “të gjithë duhet të jenë të vetëdijshëm se situata është jashtëzakonisht shpërthyese dhe se gjithçka është e mundur, madje edhe lufta”.
Raportohet se 11 njerëz u vranë nga sulmet e së dielës. Mbi 700 janë vrarë prej se Izraeli i nisi bombardimet e pareshtura të hënën e 23 shtatorit.
Ndërkohë, numri i të zhvendosurve nga lufta në jug të Libanit është dyfishuar dhe tani ka arritur në 211.000, sipas Kombeve të Bashkuara.
Hezbollahu është grup militant dhe parti politike njëkohësisht, i cili e kontrollon pjesën më të madhe të Libanit jugor.
Hezbollahu është shpallur organizatë terroriste nga Shtetet e Bashkuara, ndërsa Bashkimi Evropian e ka vendosur në listën e zezë krahun e tij të armatosur, por jo edhe partinë e tij politike. Partia politike e Hezbollahut ka ulëse në Parlamentin libanez.
Netanyahu ka thënë se Izraeli do të vazhdojë ta luftojë kërcënimin nga Hezbollahu dhe ta sigurojë kthimin e sigurt të izraelitëve të shpërngulur nga shtëpitë e tyre në kufi me Libanin.
“Ne do të vazhdojmë ta degradojmë Hezbollahun derisa t’i arrijmë synimet tona”, tha Netanyahu të shtunën.
Marina izraelite e shkatërroi një raketë që po shkonte në drejtim të Izraelit nga Deti i Kuq, ndërsa tetë raketa të tjera të shkrepura nga toka libaneze ranë në zona të hapura, tha ushtria izraelite.
Nasrallahu u vra gjatë sulmeve masive ajrore të Izraelit kundër selisë qendrore të këtij grupi në jug të Bejrutit të premten.
Vrasja e Nasrallahut është goditje e rëndë për Hezbollahun dhe Iranin. Gjatë 30 vjetëve në krye të Hezbollahut, Nasrallahu e shndërroi këtë milici shiite në një forcë të madhe politike në Liban, si dhe në një armik të fuqishëm të Izraelit fqinj.
Izraeli njoftoi vrasjen e tij të shtunën, ndërsa Hezbollahu e konfirmoi vdekjen e tij më vonë.
Hezbollahu ka thënë se do të vazhdojë të luftojë kundër Izraelit pas vrasjes së tij dhe ka vazhduar të hedhë raketa drejt Izraelit edhe të dielën.
Përshkallëzimi mes Izraelit dhe Hezbollahut ka rritur frikën se konflikti mes tyre mund të dalë nga kontrolli dhe ta zhysë edhe Iranin dhe Shtetet e Bashkuara në të.
Hezbollahu dhe Izraeli kanë këmbyer zjarr përgjatë kufirit paralelisht me luftën e Izraelit në Gazë kundër Hamasit – një grupi tjetër të shpallur terrorist nga SHBA dhe BE.
Hezbollahu thotë se po e lufton Izraelin në mbështetje të Hamasit, i cili e kreu një sulm në jug të Izraelit tetorin e kaluar duke e nxitur luftën në Gazë.
Më shumë se 1.670 njerëz, përfshirë 104 fëmijë, janë vrarë nga sulmet izraelite në Liban prej 8 tetorit të vitit të kaluar, sipas Ministrisë së Shëndetësisë së Libanit./ REL
