Deputeti pa parti, Enkelejd Alibeaj foli në A2 CNN në lidhje me dënimin me burg të deputetit Ervin Salianji për një dosje ku kur u denoncua trafikanti Geron Xhafaj ishte në krah të tij, por jo kur gjykata mori vendimin që ta burgosë.
Deputeti demokrat deklaroi se i vjen keq për dënimin e Salianjit, teksa e përgëzoi këtë të fundit që u përball me shpatullat e tij me drejtësinë.
Por, në mënyrë qesharake, Alibeaj deklaroi se Partia Demokratike nuk duhet të reagonte për burgosjen e kolegut të tyre, edhe pse ai mori një dënim për hakmarrje politike të kryeministrit Edi Rama dhe Fatmir Xhafaj, si dhe të pa bazuar në prova dhe në ligj.
“Është e rëndë që një individi i kufizohet liria. Në situatën ku jam si politikan, si deputet duhet të marr një farë kohe për t’u zhveshur nga emocionet. Kisha një lloj keqardhje. Keqardhjen më të madhe e kam për familjarët e Salianjit. Janë ata të parët që ndjejnë…Përgëzoj qëndrimin e Salianjit që mbajti që shkoi të përballet me dënimin.
Një politikan kur ka një hesap me drejtësinë mban një qëndrim dhe e mban me shpatullat e veta. Dy muaj më parë 2 nga 3 gjyqtarët gjykatën dhe çështjen e vulës. E gëlltita padrejtësinë e bërë nga ata gjyqtarë, sepse besoj se në politikë duhet të jesh koherent. Në raport me sistemin e drejtësisë nuk duhet të reagonin edhe në këtë çështje.”, tha Alibeaj.
