Partia Demokratike do të mbledhë ditën e diel, në orën 18:00 Këshillin Kombëtar në selinë blu.
Në fokus të mbledhjes do të jetë miratimi i vendimeve të marra nga Kryesia dhe grupi parlamentar në lidhje me aksionin që do të ndjekë opozita pas burgosjes së deputetit Ervin Salianji.
Partia Demokratike ka thirrur një protestë kombëtare më 6 Tetor, por nuk do të jetë si protestat e tjera para godinës së Kryeministrisë, por nga ajo që është thënë do të bllokohen rrugët kryesore si dhe rrugët që të çojnë në aeroporte dhe porte.
Gjykata e Apelit dënoi ditën e djeshme me 1 vit burgim Ervin Salianjin për shkak se i prishi imazhin Qeverisë duke denoncuar Geron Xhafajn, vëllain trafikant droge të ish-ministrit Fatmir Xhafaj.
Partia Demokratike e ka konsideruar këtë vendim si një hakmarrje politike të Edi Ramës dhe Fatmir Xhafajt dhe të pambështetur në prova dhe në ligj.
Grupi Parlamentar i PD-së mori vendimin në mënyrë unanime ditën e sotme për t’u ngujuar në selinë e PD-së dhe të mos e linin Ervin Salianjin që të vetëdorozohej, për shkak të vendimit të padrejtë, por më pas respektuan vendimin e kolegut të tyre, i cili vendosi të shkojë vetë në Polici
Ervin Salianji pritet ta ankimojë vendimin e Apelit në Gjykatën e Lartë.
