Partizani ka arritur të marrë një fitore të pastër përballë Egnatias, në fushën e kësaj të fundit në Rrogozhinë, duke e konsideruar si një “hakmarrje” për finalen e “Final Four” të humbur sezonin e kaluar që vendosi dhe fatin e titullit.
Të kuqtë arritën të shënonin nga një gol për secilin fraksion loje, ku në minutën e 20′ të takimit ishte i riu Redon Ismaili, ai i cili shënoi gol. Pas një goditje këndi të harkuar nga Rrapaj, topi pas gjuajtjes së Mehmetit shkoi në këmbët e Ismailit, i cili i vetëm para portës e shtyn në rrjetë.
Egnatia “u zgjua” vetëm në fundin e pjesë së parë me disa raste, por pa shënuar gol, teksa me rezultatin 0-1 edhe dy ekipet iu drejtuan dhomave të zhveshjes për pushimin midis pjesëve.
Pjesa e dytë nis me zëvendësime të shumta, ku për Egnatian, Zejnullai, Kasa dhe Jahaja hyjnë në fushë në vend të Vuthajt, Ramës dhe Lushkjes. Ndërsa te Partizani ishte Bintsuka i cili mori vendin e Mba, teksa kryeqytetasit bënë një zëvendlsim të detyruar për shkak dëmtimi dhe në pjesën e parë, ku Mehmeti i la vendin Taipit.
Edhe me fillimin e fraksionit të dytë të lojës ishte Partizani me disa raste shënimi, teksa në minutën e ’60 do të shënonte dhe golin e dytë me anë të Bintsuka, pas një kundërsulmi të ekipit të tij.
Pavarësisht rasteve të tjera, rezultati do të mbetej i pandryshuar, teksa Partizani merr një 3-pikësh të artë, duke e çuar në kuotën e 12 pikëve, një më shumë sesa Egnatia, e cila nuk arrin të shënojë gol në dy ndeshje rrjesht.
