Policia e Tiranës ka goditur një rast të tregtimit të bizhuteri të ndryshme, të cilat dyshohet se janë sjellë në territorish shqiptar kontrabandë, teksa si rezultat është vënë nën hetim një grua dhe është shpallur në kërkim djali i saj.
Më konkretisht, në kuadër të operacionit policor të koduar “Silver” është proceduar penalisht shtetasja D. B., 50 vjeçe, e cila akuzohet për veprat penale “Fshehja e të ardhurave”, ”Kontrabanda me mallra të tjerë” dhe ”Tregtimi dhe transporti i mallrave që janë kontrabandë”.
Gjithashtu, blutë e kryeqytetit raportojnë se është shpallur në kërkim dhe po punohet për lokalizimin e djalit të saj, shtetasit I. B., 28 vjeç.
“Gjatë operacionit është ushtruar kontroll në një subjekt në rrugën “Muhamet Gjollesha”, dhe në një tjetër në një qendrër tregtare në rrugën Tiranë-Durrës. Gjatë kontrolleve në këto subjekte, shërbimet e Policisë, gjetën dhe sekuestruan, në cilësinë e provës materiale, aksesorë argjendi për të cilat nuk disponoheshin fatura doganore e tatimore dhe të ardhurat e përfituara nga shitja e tyre, fshiheshin nga dy autorët e dyshuar.
Në cilësinë e provës materiale janë sekuestruar aksesorë argjendi, me peshë 9830 gram, të dyshuar të kontrabanduar.” – thuhet në njoftimin e Policisë.
Materialet proceduriale i kaluan Prokurorisë së Tiranës për veprime të mëtejshme.
