Janë zbardhur detaje të reja nga aksioni i raportuar ditën e sotme nga Policia e Tiranës, e cila ka goditur një rast të tregtimit të bizhuteri të ndryshme, të cilat dyshohet se janë sjellë kontrabandë në territorish shqiptar.
Burime për mediat bëjnë me dije se bëhet fjalë për dy dyqanet “Izmiri Shop” në kryeqytet, një biznes i njohur, i cili reklamohet nga personazhet e “TikTok-ut” në rrjetet sociale.
Policia e Tiranës bëri me dije se në kuadër të operacionit policor të koduar “Silver” ka shpallur në kërkim pronarin e dyqaneve, Izmir Bengaj, 28-vjeç.
Gjithashtu, është vënë nën hetim dhe mamaja e tij, shtetasja Donika Bengaj, 50-vjeçe, e cila akuzohet për kryerjen e veprave penale “Fshehja e të ardhurave”, ”Kontrabanda me mallra të tjerë” dhe ”Tregtimi dhe transporti i mallrave që janë kontrabandë”.
Gjatë kontrollit në dy dyqanet e tyre, blutë e kryeqytetit sekuestruan 9830 gram aksesorë argjendi, të dyshuar si të kontrabanduar. Mallrat ishin tregtuar pa dokumentacion doganor dhe tatimor, ndërsa të ardhurat e përfituara fshiheshin nga autorët.
“Gjatë operacionit është ushtruar kontroll në një subjekt në rrugën “Muhamet Gjollesha”, dhe në një tjetër në një qendrër tregtare në rrugën Tiranë-Durrës. Gjatë kontrolleve në këto subjekte, shërbimet e Policisë, gjetën dhe sekuestruan, në cilësinë e provës materiale, aksesorë argjendi për të cilat nuk disponoheshin fatura doganore e tatimore dhe të ardhurat e përfituara nga shitja e tyre, fshiheshin nga dy autorët e dyshuar.
Në cilësinë e provës materiale janë sekuestruar aksesorë argjendi, me peshë 9830 gram, të dyshuar të kontrabanduar.” – thuhej në njoftimin e Policisë.
Materialet proceduriale i kaluan Prokurorisë së Tiranës për veprime të mëtejshme.
