Detaje të reja kanë dalë nga ngjarja tragjike që u shënua gjatë natës së sotme në fshatin Nikoliq të Hasit ku nënë e bir kanë humbur jetën pasi banesa e tyre u përfshi nga flakët.
Raportohet se djali Rexh Lushi është futur në banesë për të shpëtuar nënën e tij, Fatime Lushi, por nuk ka mundur t’ia dalë pasi ka mbetur i bllokuar brenda.
Ndërsa bashkëshortja e viktimës, shtetasja me iniciale A. L., ka mundur të dalë nga banesa.
Trupat e pajetë të nënë e bir janë nxjerrë nga banesa pas shuarjes së flakëve.
“Rreth orës 02:00, në fshatin Nikoliq, dyshohet se aksidentalisht ka rënë zjarr në banesën e shtetasit R. L.
Si pasojë e zjarrit, kanë humbur jetën shtetasi R. L. dhe nëna e tij, shtetasja F. L., ndërsa bashkëshortja e shtetasit R. L., shtetasja A. L., ka mundur të dalë nga banesa.”- njofton policia.
Grupi hetimor, në drejtimin e prokurorit, po punon për përcaktimin e shkakut të rënies së zjarrit.
