Teksa u lirua disa ditë më parë nga Gjykata e Fierit, ish-kryebashkiaku i dënuar i Himarës, dhe eurodeputeti i sapo zgjedhur Fredi Beleri, ka komentuar eksperiencën 16 mujore në burg
Në një intervistë për RTSH, Fredi Beleri, Beleri tha se në burg kishte zënë miqësi me atë që i kishte kundërshtarë politikë, apo ish-bashkëpunëtorë të kryeministrit Edi Rama, por që brenda qelive u bënë miq.
“Në sektorin ku isha, edhe në Durrës, edhe në Fier, ndodheshin të ndaluar, subjekte të SPAK, persona politikë dhe publikë, që, në fillim u është bërë gjyqi në media dhe në publik, pastaj del SPAK dhe e certifikon gjykata. Kam qenë në burg me zotin Lefter Koka, Safet Gjici, Alqi Bllako, drejtorët e bashkisë Tiranë, kryebashkiakun e Bulqizës, të Fushë Arrëzit.
Nuk njihja askënd nga këta më parë, por u miqësuam, pasi ndanim të njëjtin ambient. Kam një falenderim për të gjithë, pasi më kanë respektuar dhe më kanë pritur në mënyrën më të mirë”, deklaron Beleri.
Ndërsa më tej ai deklaron se kishte ish-zyrtraë të Partisë Socialiste, tashmë të arrestuar që mbronin idealet politike, por kryesorja ishte se të gjithin kishin rezerva për SPAK, pasi sipas tij problemi i tyre ishte padrejtësia që vinte nga mungesa e procedurave ligjore, nga mosrespektimi i shtetit ligjor
“Kishim shpesh edhe debate politike. Secili mbronte idetë e veta. Kishte nga ata që e mbronin PS, kishte nga ata që nuk e mbronin, por ata nuk fajësonin PS pse ishin arrestuar. Problemi i tyre ishte padrejtësia që vinte nga mungesa e procedurave ligjore, nga mosrespektimi i shtetit ligjor që e ka burimin nga SPAK-u”, u shpreh Beleri, i cili përgënjeshtroi edhe një lajm të përhapur disa javë më parë, se ai i kishte shpëtuar jetën një ish- kryebashkiaku në burg.
Ndërsa për herë të parë ka komentuar edhe zgjedhjen si eurodeputet i Greqisë, teksa ironizon kryeministrin Edi Rama, për të cilin deklaron se nëse nuk do ta kishte arrestuar, nuk do ishte zgjedhur deputet i Parlamentit Europian.
“Po të mos ishte Edi Rama, nuk do të isha bërë kurrë deputet në Parlamentin Europian. Po të mos kishte urdhëruar arrestimin tim, po të mos kishte urdhëruar drejtësinë të shkelë ligjin me të dyja këmbët, unë do te isha një kryetar bashkie me probleme shumë të mëdha. Unë s’kisha shkopin magjik, do të konsumohesha për dy vjet dhe gjysmën e atyre që më duartrokasin sot, do të ishin të pakënaqur.
Megjithatë, do të preferoja të isha kryetar i Bashkisë Himarë dhe e kam synim prapë, nëse zgjidh në kohë çështjen në Gjykatën e Strasburgut”, tha Fredi Beleri.
Ish-kryebashkiaku i Himarës u dënua me 2 vite burgim, nga të cilat i kishin mbetur më pak se dy muaj dhe që Gjykata e Fierit ia konvertoi me kusht, duke e liruar para kohe. Beleri tha se do e vijojë betejën e tij për drejtësi deri në Strasburg dhe se do përfshihet në politikën shqiptare.
