Shqipëria fitoi me një përmbysje spektakolare 1-2 ndaj Ukrainës duke nisur me këmbën e mbarë rrugëtimin në Ligën e Kombeve.
Heronjtë kuqezi ishin Ardian Ismajli dhe Jasir Asani me golat e tyre. Në përfundim të ndeshjes, foli autori i golit të parë Ardjan Ismajli.
“E dinim që Ukraina është e fortë fizikisht, nuk ka dallim nga Çekia. Me një taktiktë të jashtëzakonshme, tifozët pas dhe luftë të paparë duke ndihmuar njëri-tjetrin morëm këtë fitore. Është hera e parë që mposhtim Ukrainën.”
Mosaktivizimi në Europian – Unë jam profesionist, është e vërtetë që nuk kam pasur minuta në Europian, e pranova zgjedhjen e trajnerit me sportivitet.
Unë gjithmonë kam dhënë maksimumin si në ekip edhe në Kombëtare, do ta bëj deri në fund këtë gjë. Mentalisht kam qenë jo mirë, e rëndësishme është që pushuam, u rikthyem te skuadrat tona dhe u rikthyem si profesionistë të vërtetë.
Këtë fitore, këtë gol, këtë ndeshje ja dedikoj familjes sime pasi kanë bërë shumë që unë të jem këtu.
Isha pranë golit të dytë, më të rëndësishme ishin ato që prita në mbrojtja. Kur shënuam 2-1 Ukraina na sulmoi shumë dhe bëra shumë ndërhyrje”, u shpreh Ismajli për “Klan Kuq e Zi”.
