Ervin Hoxha, Ministër i Brendshëm prej 1 gushtit ndodhet në detyrë por ka qëndruar “nën hije” duke iu shmangur daljeve publike e mediatike.
Pavarësisht këtij profili të ulur këto 36 ditë në detyrë, Ervin Hoxha sot është “zgjuar” duke hartuar një mori me ndryshime të thella në Ministrinë që drejton.
“Top Channel” duke iu referuar burimeve nga Ministria e Brendshme dhe qeveria kanë mundur të mësojnë atë që pritet të shpalosë ministri Hoxha paraditen e së premtes.
Priten ndryshime të shumta në Drejtorinë e Përgjithshme të Policisë së Shtetit, duke përfshirë të gjithë zinxhirin drejtues dhe drejtuesit e drejtorive vendore.
Gjithashtu priten ndryshime edhe në drejtimin e drejtorive në varësi të Ministrisë së Brendshme.
Ditët e fundit është përfolur në media edhe shkarkimi i mundshëm i Drejtorit të Policisë së Shtetit, Muhamet Rrumbullaku për shkak se shumë krime në vend kanë mbetur ende pa u zbardhur.
