Policia ka reaguar në lidhje me plagosjen në zonën e Astirit.
Blutë bëjnë me dije se gjatë një konflikti për motive të dobëta Darmian Keli, 25 vjeç goditi me thikë një 34-vjeçar.
I plagosuri, Amaralando Hoxhallari, 34 vjeç, është transportuar në spital dhe ndodhet në gjendje të rëndë, nën kujdesin e mjekëve. Hetimet për zbardhjen e motiveve dhe rrethanave të ngjarjes janë në vazhdim nga grupi hetimor.
Njoftimi i policisë:
Plagosi me mjet prerës një shtetas, për motive të dobëta, identifikohet dhe shoqërohet në komisariat autori i dyshuar.
Shërbimet e Komisariatit të Policisë Nr. 6 dhe ato të Forcës së Posaçme “Shqiponja”, pas marrjes së njoftimit se në Unazë të Re, sot rreth orës 18:45, një shtetas kishte plagosur me mjet prerës, një 34-vjeçar, kanë organizuar menjëherë punën për kapjen e autorit dhe vënien e tij përpara përgjegjësisë ligjore.
Si rezultat i veprimeve të shpejta policore, u kap dhe u shoqërua në komisariat për veprime të mëtejshme procedurale shtetasi D. K., 25 vjeç, banues në Tiranë.
Nga veprimet hetimore dyshohet se shtetasi D. K., për motive të dobëta, ka plagosur me mjet prerës shtetasin A. H., 34 vjeç, i cili ndodhet në spital, nën kujdesin e mjekëve.
Vijon puna nga grupi hetimor për sqarimin e rrethanave të ngjarjes.
