ZYRTARE/ Ballkani blen për 120 mijë euro mbrojtësin e Teutës |

Ajo që përflitej pre ditësh, tashmë është bërë zyrtare. Elmando Gjini është lojtari më i ri i Ballkanit të drejtuar nga Ilir Daja.

Përmes një postimi në rrjetet sociale, kampionët e Kosovës bëjnë me dije se kanë nënshkruar një kontratë 4-vjeçare me qendërmbrojtësin 21-vjeçar, i cili sezonin e kaluar shkëlqeu me Teutën në Kategorinë Superiore.

Burime për mediat bëjnë me dije se durrsakët kanë mbushur arkën me 120 mijë euro nga shitja e Gjinit, teksa kanë mbajtur edhe 15% të vlerës së kartonit të mbrojtësit.

Superiores i ikën një tjetër lojtar me vlerë, teksa Gjini bëhet lojtari i dytë që Ballkani blen nga Shqipëria brenda kësaj merkato vere, pas afrimit të Geralb Smajlit për 100 mijë euro nga Vllaznia

Gjithashtu, kampionët e Kosovës kanë shfaqur interes edhe për anësorin Mustapha Salami, i cili është nën kontratë me Kukësin dhe duhet të derdhin një tjetër shumë në arkat e klubit verilindor.

Lexo edhe:

Statistikat kundër durrsakëve, Teuta 4 vite pa fitore në Shkodër

Teuta e karikuar para Vllaznisë, situata në kampin durrsak

NJOFTIMI ZYRTAR I BALLKANIT:

Tifozë të dashur,

Skuadra nga dita në ditë po plotësohet e po komponohet!

Për t’i ndjekur objektivat tona ashtu siç na takon, kemi kënaqësinë të ju njoftojmë se kampionëve të Republikës së Kosovës, iu është bashkuar edhe një futbollist kualitativ.

Mbrojtësi 21 vjeçar, Elmando Gjini, tashmë është veshur portokall e zi

Lojtari që mbron ngjyrat e Kombëtarës së Shqipërisë, së fundmi ishte pjesë e Teutës së Durrësit, skuadër me të cilën FC Ballkani ka arritur marrëveshje për blerjen e kartonit të tij.

Me futbollistin që karrieren te grupmoshat e reja e ka zhvilluar te disa skuadra evropiane, ndër to Genoa e Bologna të Serie A, kemi nënshkruar kontratë 4 vjeçare.

Klubi i dëshiron mirëseardhje shkodranit, duke i uruar suksese drejt arritjes së synimeve tona të përbashkëta.

Na priftë e mbara!