Dy persona janë arrestuar nga policia e Malësisë së Madhe, pasi ishin shpallur në kërkim në kuadër të operacionit ‘Territor i pastër’.
Bëhet fjalë për Durim Rama dhe Sajmir Kacoli, të cilët dyshohet se në bashkëpunim me njëri-tjetrin janë kanë mbjellë dhe kultivuar 2464 bimë narkotike në Malësi të Madhe.
Njoftimi i policisë:
Malësi e Madhe/Hetime proaktive intensive po kryhen për të identifikuar dhe arrestuar autorët e kultivimit të bimëve narkotike të asgjësuara gjatë megaoperacionit “Territor i pastër”.
Bashkautorë për kultivimin e 2464 bimëve narkotike, në fshatin Selcë, të asgjësuara nga Policia, më datë 03.07.2024, kapen dhe vihen në pranga 2 shtetas.
Njëri prej tyre ishte shpallur në kërkim gjatë megaoperacionit, ndërsa tjetri u identifikua nga hetimi proaktiv njëmujor, i kryer në bashkëpunim me Prokurorinë e Shkodrës.
Në vijim të veprimeve operacionale dhe hetimore, të kryera në kuadër të megaoperacionit “Territor i pastër”, Seksioni për Hetimin e Krimeve i Komisariatit të Policisë Malësi e Madhe kapi dhe vuri në pranga shtetasit D. R., 57 vjeç, banues në Elbasan dhe S. K., 39 vjeç, banues në fshatin Hot.
57-vjeçari ishte shpallur në kërkim, më datë 03.07.2024, si autor i dyshuar i kultivimit të 2464 bimëve narkotike cannabis sativa, në fshatin Selcë, ndërsa shtetasi S. K. u identifikua si bashkautor në këtë veprimtari kriminale, si rezultat i hetimit proaktiv.
Materialet procedurale i kaluan Prokurorisë pranë Gjykatës së Shkallës së Parë të Juridiksionit të Përgjithshëm Shkodër, për veprime të mëtejshme.
