Eksperti i ekonomisë Pano Soko tha në MCN se zhvlerësimi i euros ka ndikuar edhe te rritja e çmimeve në turizëm, e për pasojë edhe në humbjen e “trofeut” të të qenit një treg i lirë turistik.
Soko tha se përpos goditjes së eksporteve, një problem më i madh do jetë në të ardhmen edhe mos shitja e mallrave brenda vendit, pasi mallrat që vijnë nga jashtë do kushtojnë më pak se ato shqiptare
“Komponentet që kanë ndërhyrë janë në ndërthurje mes ekonomisë së bardhë, dhe parave të pista që vijnë kryesisht nga jashtë. Këto dy komponentë s’duhen parë të veçuar, sepse efektet i japin të përbashkët. Ka ndikim të dy komponentëve. Eksportuesit janë të dëmtuarit final nga kjo situatë. Mund t’u referohemi edhe shifrave të rënies së eksporteve nga viti në vit. Këta janë viktimat e kësaj situate, s’janë të vetmit, por më të mëdhenjtë.
Viktima janë edhe operatorët turistikë. Një euro e dobët do të thotë që turizmi shqiptar të kushtojë më shtrenjtë. Janë rritur çmimet e operatorëve turistikë që ofrohet në vendin tonë, mesatarisht me 10 për qind, vetëm për shkak të rënies së eurot. Fakti që sivjet e kemi humbur trofeun e të qenit një treg i lirë turistik, unë besoj se një ndër faktorët që ka ndikuar është edhe fakti i zhvlerësimit të euros, dhe forcimi i lekut. Më pak turistë janë tërhequr nga Shqipëria sepse nuk është më aq e lirë sa ç’ka qenë. Euro ka goditur edhe turizmin, dhe efektet do t’ia shohim edhe në vitet në vijim.
Hallka e tretë që është goditur janë të gjithë ata që jetojnë me remitanca. Do kemi problematikë të thelluar të gjithë rrezja e eksportit. Rënia e euros do bëjë që mallrat e huaja të kushtojnë më pak se mallrat shqiptare, dhe ky që do ta shesë në Shqipëri, s’do ta shesë më në Shqipëri, dhe ky do jetë problemi më i madh që do kemi. S’kanë pasur efekt fare ndërhyrjet e Bankës së Shqipërisë, është komplet e pafuqishme ndaj këtyre kurseve që determinojnë ekonominë sot. Shqipëria e parave të pista po qëndron si shkëmb graniti buzë Adriatikut, siç thoshte shoku Enver!” – tha Pano Soko.
