Ditët t e fundit, Tirana është përfshirë nga disa vetëvrasje, teksa një tjetër ngjarje e rëndë është regjistruar edhe mëngjesin e sotëm.
Autoritetet policore raportojnë se një e moshuar dyshohet se është hedhur nga kati i 5-të i pallatit, teksa ka ndërruar jetë në vendin e ngjarjes. Viktima është shtetasja Sh. S., 78 vjeçe, ndërsa ngjarja e rëndë ka ndodhur në rrugën “Hamdi Sina”.
Nuk dihen arsyet se çfarë e kanë shtyrë të moshuarën drejt këtij akti ekstrem. Grupi hetimor po punon për sqarimin e rrethanave të ngjarjes.
Kujtojmë se dy ditë më parë, një tjetër e moshuar, shtetasja S. H., 81 vjeçe u gjet e vetëvarur në banesën e saj tek Medreseja, ndërsa shtetasja N. L., 23 vjeçe dyshohet se është hedhur nga kati i 5-të i pallatit në rrugën “Asim Vokshi.
Po ashtu, dy ditë më parë në kryqëzimin e rrugës “Medar Shtylla” me rrugën “Sulejman Delvina”, shtetasja M. S., rreth 68 vjeçe, duke pastruar dritaren e banesës së saj, dyshohet se aksidentalisht u rrëzuar dhe ra nga lartësia e katit të 6-të, duke shënuar kështu tre viktima brenda pak orësh në kryeqytet.
