Jack Russell, bashkëthemeluesi kryesor i grupit glam metal, Great White , vdiq të enjten në moshën 63-vjeçare. Vdekja e tij u konfirmua në rrjetet sociale të muzikantit.
Në korrik, këngëtari kishte ndarë një deklaratë në lidhje me luftën e tij me demencën.
“Me pikëllim të thellë, njoftojmë humbjen e të dashurit tonë Jack Patrick Russell – babai, bashkëshorti, kushëriri, xhaxhai dhe miku”, nis deklarata, duke shtuar se këngëtari kaloi momentet e fundit i rrethuar nga gruaja e tij Heather Ann, djali Matthew Hucko dhe familjarë e miq të tjerë.
“Jack do kujtohet gjithmonë për sensin e tij të humorit, dëshirën e jashtëzakonshme për jetën dhe kontributin e patundur në rock and roll, ku trashëgimia e tij do të jetojë dhe lulëzojë përgjithmonë.”
Familja po kërkon privatësi dhe ndau se detajet e një memoriali publik do të shpallen në një datë të mëvonshme.
