Policia e Shkodrës në vijim të operacionit të koduar “Territor i Pastër” ka asgjësuar 11 637 bimë dhe 6832 fidanë narkotikë kanabis sativa, si dhe ka sekuestruar 10.5 kg lëndë narkotike kanabisi në proces tharje.
Më konkretisht, shërbimet e komisariatit të Policisë Vau i Dejes kanë gjetur 300 bimë narkotike kanabis sativa. Gjithashtu, është arrestuar edhe autori i dyshuar i kultivimit të 86 bimëve në këtë zonë, shtetasi Klevis Preçi, 24 vjeç, i cili është jkapur mes parcelës duke u kujdesur për kanabisin.
Gjithashtu, është proceduar në gjendje të lirë, dhe autori i dyshuar i një rasti tjetër kultivimi në Vaun e Dejës, shtetasi A. P., 57 vjeç. Më tej, nisi procedimi në gjendje të lirë, për shpërdorim të detyrës, për kryetarin e fshatit Mnelë e Madhe, shtetasin Z. B..
Ndërkohë, shërbimet e Policisë Fushë Arrëz kanë asgjësuar 6832 fidanë narkotikë të mbjellë në kubikë dhe 1280 bimë narkotike në proces tharjeje, si dhe sekuestruan 10.5 kg të kësaj lënde narkotike, gjithashtu në proces tharjeje.
Në vijim të veprimeve procedurale, u referuan materialet në Prokurori, ku nisi procedimi në gjendje të lirë, për veprën penale “Shpërdorimi i detyrës”, për shtetasit Y. S., kryetar i njësisë administrative Fierzë dhe A. M., specialist pyjesh në këtë njësi.
Gjithashtu, shërbimet e Policisë së Malësi së Madhe kanë gjetur 4407 bimë narkotike kanabis sativa. Në vijim të veprimeve procedurale, u referuan materialet në Prokurori, ku nisi procedimi në gjendje të lirë, për veprën penale “Shpërdorimi i detyrës”, për shtetasit Gj. Gj., kryetar i fshatit Bratosh dhe L. B., specialist pyjesh në këtë fshat.
Po ashtu, shërbimet e Policisë Shkodër dhe ato të stacionit të Policisë Theth gjetën në territoret e njësive administrative Shosh, Pult dhe Postribë, dhe asgjësuan 5650 bimë dhe fidanë narkotikë kanabis sativa.
