Drejtori i Përgjithshëm i Policisë së Shtetit, Muhamet Rrumbullaku, ka urdhëruar hetim për Policinë e Korçës dhe komisariatin e Pogradecit, në lidhje me ngjarjen e regjistruar dy ditë më parë, ku u vra 42-vjeçari Egli Proga.
Ky i fundit u dhunua me sende të forta nga 29-vjeçari Denis Mece, i cili është nipi i Valter Gorës, një ish-drejtor n¥ poste të rëndësishme në Juglindje, i arrestuar për korrupsion dhe i përfshirë në shumë afera.
Sipas komunikatës për mediat, Drejtoria e Standardeve Profesionale do të vlerësojë të gjithë tërësinë e veprimeve dhe reagimit të punonjësve të policisë, prej momentit të parë të marrjes së njoftimit mbi ngjarjen, duke synuar nxjerrjen e përgjegjësisë dhe personave përgjegjës.
“Drejtori i Përgjithshëm i Policisë së Shtetit urdhëron inspektim në Drejtorinë Vendore të Policisë, Korçë, lidhur me ngjarjen në qytetin e Pogradecit
Bazuar në Rregulloren e Policisë së Shtetit, Drejtori i Përgjithshëm i Policisë së Shtetit, Drejtues Madhor Muhamet Rrumbullaku, urdhëroi Drejtorinë e Standardeve Profesionale për kryerjen e vlerësimit të zbatimit të detyrave të strukturave në Drejtorinë Vendore të Policisë, Korçë, dhe në Komisariatin e Pogradecit, lidhur me ngjarjen ku, pas një konflikti, humbi jetën një 42-vjeçar.
Drejtoria e Standardeve Profesionale në Drejtorinë e Përgjithshme të Policisë së Shtetit do të vlerësojë të gjithë tërësinë e veprimeve dhe reagimit të punonjësve të policisë, prej momentit të parë të marrjes së njoftimit mbi ngjarjen, duke synuar nxjerrjen e përgjegjësisë dhe personave përgjegjës, nëse rezultojnë të tillë.
Drejtoria e Përgjithshme të Policisë së Shtetit shpreh edhe një herë angazhimin maksimal për zbatimin e ligjit dhe punën profesionale dhe me integritet të strukturave të policisë.” – thuhet në njoftimin e Policisë.
Ngjarja e rëndë ndodhi dy ditë më parë në qytetin liqenor, teksa fillimisht u raportua se babai i dy fëmijë Egli Proga kishte humbur jetën për shkak të konsumimit të tepërt të alkoolit.
Pas publikimit të detajeve në media, reagoi edhe Policia, duke arrestuar autorin Denis Mece, nga fshati Buçimas i Pogradecit, si dhe tre të tjerë për moskallëzim të krimit dhe veprime që pengonin zbulimin e të vërtetës.
Burime pranë grupit të hetimit bëjnë të ditur se 42 vjeçari ka qenë duke konsumuar alkool brenda lokalit në pronësi të të atit se bashku me disa persona të tjerë, atje ku ka filluar dhe konflikti me grushta dhe sende të forta
Ka qënë nipi i Valter Gorës, Denis Mece, ai i cili dyshohet se e ka goditur Egli Progën me sende të forta, duke i shkaktuar plagë të rënda dhe fraktura në kokë, të cilat i sollën edhe vdekjen.
Menjëherë pas krimit, Denis Mece është larguar nga vendi i ngjarjes ndërkohë që nga kqyrja e kamerave të sigurisë edhe për policinë është sqaruar gjithë dinamika e sherrit të ndodhur.
Denis Mece njihet si një person problematik në zonë, për shkak se ka patur edhe mbështetjen e dajës së tij socialist Valter Gora në Pogradec.
